HUA 玫瑰濾杯

Hello ha 😆 大家好又係我John😎，最近新濾杯一波接一波☕，今次介紹嘅係H.U.A. 玫瑰花🌹濾杯。呢隻亦都係我第一隻開嘅慢速濾杯！

包裝設計

首先講返成個包裝🎁先，今次玫瑰花🌹濾杯嘅包裝風格走簡約風，簡單喺牛皮紙盒上面貼住一張純色貼紙💮。入面附送咗一張黃色🌝嘅卡紙，上面用各國語言寫出「花」字🌸(字體藝術風格🎨)

設計原理

叫得做玫瑰花🌹濾杯，外觀就梗係玫瑰花造型啦。而入面不規則嘅肋骨📊勾劃出一片又一片嘅花瓣🌺，到咗玫瑰嘅根部🌱，肋骨就由不規則嘅分佈轉為呈螺旋形🌀。
可以睇得出設計師🧐想先透過上段不規則嘅肋骨放慢⏸️整體流速，最後再用返螺旋🏄‍♂️形狀肋骨避免積水💦問題。

而濾杯底座採用純木🌳配搭矽膠內圈⭕，一方面令到成個濾杯更加穩固(相信大家有用過Origami就知道點解🤣🤪) 另一方面保護比較窄嘅dripper 頸部☕，真係幾細心嘅設計。

用家體驗

首先成個濾杯，第一下上手你會覺得好靚🌝😎(尤其係對有一顆少女心💃嘅我嚟講) 而且放濾紙上去都十分服貼，感覺特別舒爽😌。
就流速方面，由於成個濾杯🙈大部分都呈現不規則的肋骨形狀🌸，整體流速比較慢🐢。大家沖嗰陣時要注意一下。(大約三分鐘🤣先完成萃取)

就風味方面，H.U.A. 玫瑰花🌹濾杯明顯就係想透過慢流速🐢嘅設計強調咖啡嘅甜度🍯同埋body☕。個人覺得可以用bypass嘅沖法💧配合濾杯設計，更加去突顯咖啡前中段嘅甜😋和酸香氣😤。

總結

其實成個玫瑰花🌹濾杯設計、造工上都幾精緻🎀，算係一個令人滿意嘅慢流速濾杯☕。不過濾杯嘅流速快慢其實唔係手沖咖啡風味☕嘅決定性因素🤣，最緊要搵返一個啱自己嘅手法🤙就可以。(知道大家都係睇中佢美貌買返去爽😍)