乜嘢係細粉？所謂嘅細粉，就係指研磨咖啡豆嘅過程中，產生嗰啲比標準粉更幼細、粒徑細過 0.1 毫米嘅咖啡粉。

無論用邊種磨豆機，都會磨出細粉。因為咖啡豆經過烘焙之後會變得比較脆，當磨豆機將咖啡豆壓碎嘅時候，好容易碎裂出一啲唔係目標大小嘅極幼細顆粒。

幾時需要篩走咖啡細粉？

細粉唔係越少越好，因為適量嘅細粉可以提升咖啡層次。由於細粉粒徑更細，入面嘅可溶物質會更快被沖溶出來，令萃取過程產生少少差異，沖出來嘅咖啡會有更豐富嘅層次感。不過，溶解得快，會連埋啲唔太好嘅雜質都一齊溶出嚟。

如果你唔太識得控制萃取過程，或者想沖出嚟嘅咖啡口感更加乾淨，咁篩走細粉就會係一個好選擇。喺國際咖啡賽事，都有參賽選手為咗追求更乾淨嘅口感，選擇篩走咖啡細粉。

適量細粉先有助提升咖啡層次感，重點係「適量」。如果細粉太多，唔單止咖啡層次冇得提升，仲好容易因為細粉塞咗濾紙，或者雜質溶出過多，令咖啡嘅味道同口感變差，比如變得更苦，又或者口感變得雜。遇到呢種情況，就需要篩走咖啡細粉。

不過大家要留意，咖啡過萃唔一定係因為細粉太多，亦有可能係萃取效率太高。所以大家要先分辨清楚過萃嘅原因，係咪真係因為細粉過量，再決定係咪要篩走細粉。

分辨方法好簡單，有兩個方法可以參考：

一、係落水嘅速度。因為細粉粒太幼細，就好似之前講過咁，好容易塞住濾紙，拖長落水時間。如果發現咖啡落水速度好慢，但係咖啡粉密度又唔高，咁好大機會就係細粉塞咗濾紙所致。

二、就係睇沖煮完之後嘅粉床，睇吓粉床入面嘅咖啡粉，係粒粒分明，定係好似爛泥。如果似爛泥，就係細粉過多

如果沖煮過程中，或者沖煮後嘅粉床出現咗以上兩個「徵狀」，而且咖啡味道帶有苦、雜呢類過萃嘅味道，咁好大機會就係細粉過多導致。遇到呢種情況，就可以試吓篩走細粉，再重新沖泡一次，睇吓咖啡味道有冇返返正常。