💬 「老闆，齋啡走甜唔該！」——你每日飲緊嘅咖啡，其實係邊位「豆星」主演？
全球過百咖啡品種，真正撐起成個產業嘅，得呢四大家族：
阿拉比卡（Arabica） | 羅布斯塔（Robusta） | 利比里卡（Liberica） | 埃塞爾薩（Excelsa）

咖啡豆特征

市場佔比：阿拉比卡（70%）> 羅布斯塔（27%）> 利比里卡+埃塞爾薩（3%）

阿拉比卡VS 羅布斯塔

阿拉比卡

• 特徵： 豆身形狀比較橢圓，中間條線彎彎地。味道係佢最大賣點：通常帶住明亮嘅果酸，好似柑橘、莓果咁，仲有陣陣花香（好似茉莉花、橙花），甜感豐富，苦味較低。咖啡因含量係四款之中最低嘅。
• 主要產地： 佢嘅老家係埃塞俄比亞！其他主要產區包括巴西、哥倫比亞、中美洲各國（如危地馬拉、哥斯達黎加）、肯尼亞，甚至我哋鄰近嘅雲南高海拔地區。

羅布斯塔 

• 特徵： 豆形比較圓身、短少少，中間條線比較直。味道方面，佢嘅招牌係濃烈嘅焦苦味、穀物味、堅果味，有時甚至帶點「燶」嘅感覺。油脂（Crema）含量超高！咖啡因含量勁高，係阿拉比卡嘅兩倍左右。
• 主要產地： 全球最大產區係越南，佔咗成半壁江山！其他重要產地包括印度、印尼（尤其蘇門答臘、爪哇）、烏干達、巴西。

利貝里卡VS 埃塞爾薩

利貝里卡

• 特徵： 豆形好易認，係四款之中最大粒，成粒巨型葵花籽咁！味道好獨特，有人形容似煙燻味、木質味，甚至帶點榴槤嘅「怪香」？尾韻會出番啲黑糖甜、或者好似燒鵝髀皮咁嘅燶香。口感通常比較厚實。
• 主要產地： 主要集中在東南亞，尤其係馬來西亞（砂勞越）、菲律賓（巴拉望）、印尼（蘇門答臘）。

埃塞爾薩

• 特徵： 豆形同羅布斯塔有啲似，但細粒少少。味道好特別，初頭飲落可能似羅布斯塔嘅木質、泥土味，但到尾段會突然跳出嚟一浸果酸同果香，有人話似士多啤梨乾、西梅乾，甚至帶點「野性」嘅風味。產量非常稀少。
• 主要產地： 主要喺東南亞嘅熱帶雨林地區生長，越南高地、老撾、柬埔寨同埋非洲嘅剛果河沿岸一帶會有少量。

Q&A

Q：點樣揀豆

• 想飲花香果酸、層次豐富？揀 阿拉比卡 穩陣。
• 要勁濃、勁提神、愛港式茶記風味？羅布斯塔 係你杯茶。
• 想試獨特煙燻、木質、黑糖風味，搵懷舊南洋 feel？去尋寶搵 利比里卡。
• 想杯 Espresso 多啲層次同驚喜？留意有冇拼 埃塞爾薩 嘅豆。

Q：點解超市罐裝咖啡咁平，但精品咖啡店一杯要成百蚊？

• 平價罐裝咖啡通常主要用 羅布斯塔 豆，而且可能混咗啲質素冇咁好或者擺得耐嘅豆，成本低好多。精品店用嘅係新鮮烘焙、質素高嘅 阿拉比卡 單品豆，由種植、處理、運輸到烘焙都講究好多，成本可以相差 $80 一磅甚至更多！