行入咖啡店，陣陣撲鼻而來嘅桃花、蜜糖、酒心朱古力香氣，係咪真係來自咖啡豆本身？近年咖啡圈興起一股「魔幻風」，一啲味道極度誇張、香到唔自然嘅「香精豆」（Flavored Beans）充斥市場。今日就等我一於踢爆呢類「化工天王」，等各位街坊唔使再中伏！

特殊處理、增味、定係香精豆？

• 特殊處理法 (Special Processing)：利用發酵技術（例如厭氧發酵、乳酸菌發酵、蜜處理）去激發咖啡豆本身嘅天然風味。全程只靠咖啡果實、微生物同時間，零添加外來物質。
• 增味豆 (Flavor-Enhanced Beans) ：在處理過程中，加入天然來源的物質（例如雲尼拿豆莢、水果、香料）一齊發酵，讓咖啡豆吸附這些香氣
• 香精豆 (Flavored Beans) ：在烘焙後或烘焙過程中，直接噴上人工合成香精，例如「合成雲尼拿香精」、「合成草莓香精」、「合成榛子香精」等，強行賦予咖啡豆濃烈嘅假香味。

香精豆有咩危害？

• 1. 化學物落肚，加重肝腎負擔
  人工香精係化學合成物，身體需要透過肝臟同腎臟去分解同排出。長期攝取，無疑係不斷增加身體器官嘅工作負擔。
• 2. 嚐味能力被破壞
  飲開呢啲「假濃香」，你嘅味蕾會逐漸被麻痺，覺得正常天然咖啡「冇味」、「唔夠香」。就好似食慣重味精餸菜，就會覺得屋企煲嘅湯「淡茂茂」，從此失去欣賞真實、細膩風味嘅能力。

點樣分辨？

• 第1招：聞乾香——「香到離地」係警號
  • 天然豆： 香氣是溫和的、有層次的，似烘焙堅果、雲尼拿、淡淡花香或水果甜。
  • 香精豆： 香氣極度強烈、單一、刺鼻，好似一打開一包香精糖果或藥水，直衝上天靈蓋（例如：極不自然的假蜜糖味、假朱古力味）。
• 第2招：摸豆身——「油淋淋」要小心
  • 天然豆： 烘焙後表面有油光，但通常要放置幾日先慢慢滲出。
  • 香精豆： 因為表面噴咗香精，好多時摸落去會覺得「癡立立」、異常油潤，甚至聞完手指都留有假香味。
• 第3招：問來源——「產地模糊」多伏味
  • 天然豆： 資訊清晰，例如「埃塞俄比亞 耶加雪菲 歌迪貝鎮 G1」。
  • 香精豆： 來歷不明，只會用好模糊嘅名，例如「頂級蜜糖處理」、「特選紅酒風味」，但唔會講具體產地同莊園。
• 第4招：試飲感受——「得個香字」就係假
  • 天然豆： 香氣同飲落去嘅味道係一致嘅，餘韻悠長，口感豐富。
  • 香精豆： 「聞落天堂，飲落戰場」！聞起嚟香到爆炸，但一飲落口，味道同香氣完全脫節，得個酸字或者得個苦字，餘韻好短，甚至帶有化學感嘅澀味。