Hello ha 好耐冇同大家出開箱了 (最近比較多考試) 今次就同大家開箱呢個 Timemore 黑鏡2.0~

設計外形

Timemore 黑鏡2.0採用上一代嘅一體式設計，將按鈕收納於磨砂平面下。不過真係要讚一讚呢個設計，畀到人一種低調奢華嘅科技感。

• 

佢嘅按鈕同上一代唔同嘅地方就係加咗雕刻印顯示開機同計時按鈕位置，方便用家使用。

另外，佢算係少數跟得上潮流嘅智能磅，採用Type-C線叉電 (唔似市面上大多數電子磅都係用micro USB)。最後開關機採用實體按鈕亦令到磅整體更加省電同埋避免誤碰開機情況。

使用效能

首先講講手沖架嘅部分，Timemore 黑鏡2.0採用咗全新嘅固定設計透過扭緊下方嘅旋鈕進行固定

• 

改善咗手沖架整體穩定度，可以放心放任何濾杯上去

除此之外，用家仲可以用旋鈕調節濾杯同下壺之間嘅距離。最後值得一提嘅係手沖架採用咗金屬材質，表面的黑色塗層亦都十分牢固，唔容易剝落。

智能磅方面，Timemore 黑鏡2.0可以顯示即時注水流速，方便用家觀察自己注水手法。

另外，智能磅最大嘅賣點就係雙秤設計，透過機内感應器，可以同時量度出濾杯和下壺嘅重量，從而計算出咖啡液喺下壺嘅實質重量。呢個設計喺市面上真係非常少見，亦都適合一眾唔要尾水嘅玩家，去量化控制自己嘅萃取結果。

用家體驗

Timemore 黑鏡2.0成個app設計非常完善，儲存、分享沖煮曲線以及參考其他用家沖煮曲線等等功能都有，使用時app運作流暢冇乜大問題。

不過最值得一講嘅係app會顯示當下嘅粉水比同液粉比，方便用家中途改變萃取量。亦都適合一眾唔要尾水嘅玩家，去計算自己萃取量

總括而言，Timemore 黑鏡2.0 係一個設計十分完善嘅產品，整體造工紮實，用家體驗良好 符合佢本身嘅定價和定位！亦都符合timemore自家品牌嘅特色——就是集合唔同牌子嘅優點，再加以改良！