AKIRA 正晃行光爐 BH-100

Hello ha 好耐無出文了(忙緊整復活蛋)，知道大家掛住我 所以今日同大家開呢個家用神器~ Akira 正晃行 BK-100 光爐！

設計外形

今次BH-100 同以住BH-101 嘅梯形機身唔同，採用咗全黑磨砂嘅正方形設計。整體感覺比之前新潮唔少。

最值得講就係佢個體積，真係非常非常非常之細部，比起上一代尺寸縮減咗接近一半，非常適合一眾喺香港有土地問題嘅玩家，只係佔大概一個成年男子嘅手掌位。

不過唔好睇佢體積變細，其實BH-100嘅功率同上代維持不變，兩者煲水速度係一模一樣嘅。

而散熱方面BH-100依然沿用以往散熱片設計，光爐運作時可以依稀見到。

最後，除咗尺寸上嘅分別，今次BH-100 採用咗更加精密嘅刻度，方便各位用家微調自己的火力，旋扭質感亦有明顯提升。扭上手阻力啱啱好，令人心情舒暢

功能效用

買光爐除咗因為佢逆天嘅顏值，同埋開燈後嗰種妙不可言嘅儀式感之外，其實仲有唔少實際考量

第一，因為光爐毋須使用明火，比起酒精燈同登山爐更加安全

第二，用光爐加熱，虹吸壺受熱比較均勻同穩定。相信用酒精燈或者登山爐加熱嘅玩家都有遇過，上壺出現特別大嘅氣泡呢個情況，而造成情況最主要原因就係受熱不均。

不過今次光爐仲有個最大賣點，就係額外送咗一個有類似鑄鐵材質嘅光爐神器！神器可以作為手沖架放喺發熱燈上面，畀用家直接放手沖壺上去煲水或保温。令到光爐唔淨係玩虹吸嘅用具 連手沖都玩到

個人實測過光爐+神器加熱功能，600ml水要由室溫煲到100度大約要16分鐘，算係比較耐。不過呢個都係傳統光爐嘅小缺點，光爐由0開始加熱會比較慢，最主要因為佢唔係接觸式傳熱，而係放射式。

所以一般cafe煮虹吸都會先煲好一定温度嘅水，再用光爐加熱。

總括而言，今次開箱明顯感受到呢代光爐 BH-100 喺細節上比上代有所提升。不過重點都係夠晒細部方便大家偷運返屋企

立即入手Akira 正晃行BK-100 光爐：https://www.entreboxhk.com/shop/akirakoki-bh-100-nb-bh-100-wh/